Ел дәвамында төнге күк йөзендә гаҗәеп күренешләр еш булып тора. Могҗиза эзләп, матбугат чаралары «ике Айны» да, әллә нинди көтелмәгән планета парадларын да уйлап таба. Ә чынлыкта исә астрономиянең могҗизалары гади һәм матур, аларны күзәтер өчен тылсымчы булырга кирәкми.

2016 елның соңгы аенда төнге күк йөзе нинди матур күренешләр күзәтергә мөмкинлек бирә соң?

3 декабрь — матур урак рәвешендәге Ай Венерадан (Чулпан йолдызыбыздан) 5 градус ераклыкта узып үтә.

10 декабрь — Меркурий көнчыгыш элонгациягә җитә. 21 градуста була ул (элонгация – күк сферасындагы ике нокта арасында почмак ераклыгы. Планета элонгациясе исә планетаның һәм Кояшның эклиптик озынлыклары аермасын аңлата).

11 декабрь — төнге күк йөзендә берьюлы 5 планетаны күзәтеп булачак: Меркурий, Венера, Марс, Уран һәм Нептун йолдызлар арасында балкып торачак.

13 декабрь — Геминидлар метеор агымының иң куәтле чагы. Сәгатенә 100 метеор явыр дип көтелә.

21 декабрь  — Кышкы Кояш торгынлыгы. Бу көннән астрономик кыш башлана.

23 декабрь — Урсидлар метеор агымының иң көчле төне. Әмма аның куәтлелеге, әлбәттә, Геминидлар белән чагыштырырлык түгел: сәгатенә 15 метеор гына явачак.

25 декабрь — Меркурий периһелийда. Әлбәттә, моны күк йөзендә күзәтеп булмый.

28 декабрь — Меркурий Кояш белән эчке кушылышта.

31 декабрь — Хонд-Мркос-Пайдушакова кометасы периһелий халәтендә, ягъни Кояшка иң якын торган чагында була. Йолдызыбызга ераклыгы 73,9 млн чакрым булачак, кометаның күренүчәнлеге (йолдыз зурлыгы) 7,0 m була.

Кеплер белән Браге юбилей бәйрәм итә

14 декабрьдә астроном Тихо Брагеның тууына 470 ел тула. Аның җитәкчелеге астында эшләп алырга өлгергән Иоһанн Кеплерның да туган көне декабрьдә — 27се аның тууына 445 ел була.

Айдар Шәйхин тупламасы

astronet.ru буенча

фото: pics-about-science.com