Узган җомгада Япония Халыкара галәм станциясенә йөк илтә торган кораб очырды. Аның бортында Галәмдәге чүпне җыярга тиешле корылма бар.

Япониянең аэрокосмик тикшеренүләр агентлыгы галимнәре ятьмә белән тәҗрибә үткәреп, Җир орбитасында яткан фәлән тонна галәми чүпне җыярга тырышалар. Бу галәми чүп 1957 елда Советлар берлегенең «Спутник» исемле ясалма иярчене очканнан бирле Җир тирәсендә җыелган ракета калдыклары, төрле җиһазлар һәм детальләрдән тора. Бүгенгесе көндә, төрле белгечләр әйтүенчә, орбитада 100 миллионнан артык чүп кисәкләре ята, аларның һәрберсе космостагы киләчәк тикшеренүләре өчен куркыныч тудыра.

Инженерлар тутыкмый торган корыч һәм алюминийдан торган нечкә чыбыклардан электромагнит буксиры ясаганнар. Галимнәр һәрбер чүп кисәгенә берешәр трос тоташтырырга җыена. Ятьмә Җирнең магнит кыры аша узган вакытта электр энергиясе ясалачак, бу исә галәми чүпнең хәрәкәтен акрынайтачак, нәтиҗәдә, чүп түбәнрәк орбитага төшәчәк. Ахыр чиктә, бу чүп Җир атмосферасына кереп, планетаның өслегенә төшкәнче янып бетәчәк.

JAXA – Япон агентлыгы бу проект өстендә Nitto Seimo исемле балык тоту ятьмәләре җитештерү ширкәте белән берлектә эшли. 10 елдан артык вакыт дәвамында алар проектка яраклы трос ясау өстендә эшләгәннәр.

Агентлык галәми чүпне җыю системасын киләсе унъеллыкта даими кулланырга дип хыяллана.

The Guardian буенча